E sunnu sittant’anni!
Autore: Elena Artaserse –
Arriva a sittantina
c’un mali ogni matina
u sonnu non ti voli
a schina chi ti doli.
Cuminci cu na pinnula
è chiddra ra pressioni
a prima ra jurnata
e forsi non ti basta
pirchì l’hai sempri iata.
Un ghiornu mangi in biancu
e poi ti mangi i frittuli
u fichitu s’ingrossa
i calculi si smovinu.
Ti pigghi u cafè amaru
mi teni a bada u zuccuru
ma u sangu si ribella
ci piaci a vita duci.
I pila ormai ti carunu
propriu aundi non voi
e chiddri chi ti tiri
aundi ne vulivi
ti torninu a spuntari
puru nte gingivi.
Si sempri chiù cuntentu
vicinu a to mugghieri
e tu non penzi a nenti
vicinu a to maritu
pirchì vi basta pocu
mi vi caddia lu cori
vi basta na carizza
e n’ occhiata d’amuri.